Цягам доўгіх гадоў беларускія ўлады называюць карупцыю адной з асноўных праблем нашай краіны. Неаднаразова з самых высокіх трыбун гучалі патрабаванні да праваахоўных органаў узмацніць барацьбу з гэтай заразай.
Вось толькі год ад года сітуацыя становіцца ўсё горш. Нягледзячы на ўзмацненне жорсткасці заканадаўства, прыняццё розных праграм, планаў і пастановаў - пералому няма і не прадбачыцца. 
Больш таго, у апошнія гады хабарніцтва паразіла вяршыню праваахоўнай сістэмы - суды. У дадзены момант узровень карумпаванасці нашай судовай сістэмы дасягнуў пагрозлівых для нацыянальнай бяспекі памераў. Пры наяўнасці патрэбных сувязяў і матэрыяльных рэсурсаў, можна купіць практычна любое судовае рашэнне. Яшчэ ледзь-ледзь, і сітуацыя выйдзе з пад кантролю. Усё гэта адбываецца пры поўным маўчанні з боку Вярхоўнага суду і бяздзейнасці праваахоўных органаў. Аб якім змаганні са злачыннасцю наогул можа ісці гаворка, калі тыя, хто павінен вызначаць пакаранне злыдням, часцяком ні чым ад іх не адрозніваюцца.
Мы не павінны маўчаць. Мы не маем правы маўчаць. Мы не збіраемся маўчаць і верыць казкам пра тое, што нашая судовая сістэма ідэальная і бязгрэшная. Час зірнуць праблеме ў твар і сумеснымі высілкамі пачаць не на словах, а на справе чыстку нашых судоў ад “пярэваратняў у мантыях”.
“Правым Альянсам” пададзеная заяўка аб правядзенні 12 ліпеня пікету супраць карупцыі ў сістэме агульных судоў Беларусі. Адказ на нашу заяўку стане той лакмусавай паперкай па якой мы вызначым: ці зацікаўленая наша ўлада змагацца з карупцыяй на справе, а не толькі на паперы.